குமரியில் புகார் கொடுக்க வந்த பெண்ணை கர்ப்பமாக்கிய எஸ்ஐ..!

கன்னியாகுமரி மாவட்டம் மார்த்தாண்டம் பகுதியில் வசித்து வந்தவர் சுமதி (மாற்று பெயர்). இவருக்கு திருமணமாகி விவாகரத்து ஆனதால் தனது 9 வயது மகளை விடுதியில் தங்கவைத்து தனிமையில் வசித்து வந்துள்ளார்.

அப்போது இவருடன் சேர்ந்து வாழ்வதாக கூறிய வாலிபர் ஒருவர், சுமதியுடன் நெருக்கமாக இருந்துவிட்டு, அவருடைய உடைமைகளை எடுத்துக்கொண்டு தப்பியுள்ளார். இதனால், தனது பொருட்களை திரும்ப தரக்கோரி பாதிக்கப்பட்ட பெண் அந்த வாலிபரின் வீட்டுக்கு சென்றுள்ளார்.

ஆனால் அவற்றை திருப்பி கொடுக்க மறுத்த அந்த வாலிபர் மற்றும் அவருடன் இருந்தவர்கள் சுமதியை கட்டிவைத்து அடித்துள்ளனர். இதனால் அவர்கள் மீது பளுகல் காவல் நிலையத்தில் சுமதி புகார் கொடுக்க சென்றுள்ளார். புகார் பதிவானதும், அங்கு இருந்த ஏட்டு ஒருவர், பிரச்சனையை தீர்த்துவிடலாம் எனக்கூறி அந்த ஸ்டேஷனில் பணியாற்றும் எஸ்ஐயின் செல்போன் எண்ணை சுமதியிடம் கொடுத்து அனுப்பி வைத்துள்ளார்.

அதனையடுத்து, சுமதியை தொடர்பு கொன்டு பேசிய எஸ்ஐ, கண்ணுமாமூடு என்ற பகுதியில் ஒரு வீடு எடுத்து கொடுக்கிறேன், அங்கு நீங்கள் பாதுகாப்பாக இருக்கலாம் என தெரிவித்துள்ளார். அதனையடுத்து, சுமதி அந்த வாடகை வீட்டில் தங்கி வந்துள்ளார்.

இதற்கிடையில் கடந்த மே 1ம் தேதி அன்று, தான் கொடுத்த புகாரை குறித்து பேசுவதற்காக, சுமதி அந்த எஸ்ஐக்கு போன் செய்துள்ளார். அந்த இரவு சரியாக 8 மணி அளவில் சுமதி வீட்டுக்கு வந்த எஸ்ஐ, சுமதியிடம் ஆறுதலாக பேசி அவரை மொட்டை மாடிக்கு அழைத்து சென்றுள்ளார். அங்கு சிறிது நேரம் பேசிக்கொண்டிருந்தபோது, திடீரென அப்பெண்ணை கட்டி அணைத்து, கூச்சலிடாதே என்று கூறி, உறவுகொண்டுள்ளார்.

இதன் விளைவாக சுமதி கர்ப்பம் அடைந்துள்ளார். இந்த விவகாரம் எஸ்ஐக்கு தெரிந்ததும், தான் ஏற்கெனவே மூன்று பெண்களை திருமணம் செய்துகொண்டு வாழ்க்கை நடத்தி வருகிறேன். ஆகையால், இந்த கருவை கலைத்துவிடு , நான் உனக்கு தேவையானதை செய்கிறேன் என கூறியுள்ளார்.

அதற்கு மறுத்த சுமதியை அந்த எஸ்ஐ பலமுறை மிரட்டியதாகவும் கூறப்படுகிறது. இந்நிலையில், கடந்த சில தினங்களுக்கு முன்பு அந்த எஸ்ஐயும், அவருடன் இருந்தவர்களும், கருவை பரிசோதனை செய்யவேண்டும் எனக்கூறி சுமதியை அழைத்து கொண்டு திருவட்டார் கிளினீக்கிற்கு சென்றனர்.

ஆனால் அங்கு, கருவை பரிசோதனை செய்யாமல், சிசுவை கலைக்கும் நடவடிக்கையில் ஈடுபட்டதாக சுமதி கத்தி கூச்சலிட்டுள்ளார். இதனால் அங்கு பரபரப்பு ஏற்பட்டு மக்கள் கூடியுள்ளனர். இதையடுத்து அங்கு வந்த திருவட்டார் போலீசார் இளம்பெண்ணிடம் விசாரணை நடத்தி, சிகிச்சைக்காக அரசு மருத்துவமனைக்கு அனுப்பி வைத்துள்ளனர்.

இதையடுத்து மற்றொரு நாள் சுமதியின் வீட்டுக்கு மப்டியில் வந்த இரண்டு பேர், எஸ்ஐ மீது புகார் கொடுத்தால் உன் மீது வழக்கு போடப்படும் என மிரட்டி விட்டு, பழைய புகார் மனுவில் கையெழுத்து வாங்கிக்கொண்டும், வீட்டிலிருந்த செல்போன், மருந்து சீட்டுகள் ஆகியவற்றை எடுத்துக்கொண்டு சென்றுள்ளனர்.

இதையடுத்து பாதிக்கப்பட்ட பெண் டிஎஸ்பி, மாதர் சங்கம் என அடுத்தடுத்து புகார் கொடுத்த நிலையில், எஸ்ஐ, ஏட்டு உள்ளிட்ட 11 பேரால் தனது உயிருக்கு ஆபத்து இருப்பதாக கூறி, அவர்கள் மீது நடவடிக்கை எடுக்க கோரி மாவட்ட ஆட்சியரிடம் புகார் அளித்துள்ளார். இந்த சம்பவத்தால் நாகையில் பெரும் பரபரப்பு ஏற்பட்டுள்ளது.

Leave a Reply